Santiago Solari është i lumtur me paraqitjen e Real Madridit ndaj Barcelonës, por i vetëdijshëm se gjithçka është e hapur për ndeshjen e kthimit në fund të këtij muaji.
Real Madridi u largua nga Camp Nou me rezultat pozitiv, pasi barazoi 1-1 me Barcelonën në ndeshjen e parë gjysmëfinale të Kupës së Mbretit të mërkurën, raporton Gazeta Express.
Trajneri i madrilenëve Santiago Solari tha pas ndeshjes se skuadra e tij pati raste të shënonte më shumë gola, dhe se kjo ndeshje tregon se lojtarët e tij po punojnë seriozisht.
“Ne gjithmonë duam të fitojmë dhe mendoj se kemi pasur raste për të shënuar edhe golin e dytë. Jemi të lumtur me atë që kemi bërë, kjo ndeshje është konfirmim se lojtarët janë duke punuar shumë seriozisht”, tha Solari.
Ai, megjithatë, është i vetëdijshëm se gjithçka është e hapur për ndeshjen e kthimit më 27 shkurt në Santiago Bernabeu, kur skuadra e tij do ta ketë përparësinë e golit si mysafir dhe terrenit vendas.
“Rezultati është i hapur, në ndeshje të këtij lloji mund të ndodhin shumë gjëra. Sot ne treguam se jemi një grup lojtarësh që punojnë shumë seriozisht”, shtoi ai. /Gazeta Express/
