Sllovakia vazhdon të mbështesë Kosovën në shumë fusha, por mbetet njëri ndër pesë vendet e Bashkimit Evropian që ende nuk e ka njohur pavarësinë e Kosovës.

Ata nuk deklarohen haptas se kur mund t’i bashkohen grupit të shteteve që e njohin subjektivitetin shtetëror të Kosovës, por thonë haptas se e mbështesin perspektivën evropiane të Ballkanit Perëndimor, përfshirë Kosovën.

Peter Stano, zëdhënës i Ministrit të Punëve të Jashtme dhe Evropiane të Sllovakisë, Miroslav Lajcak, njëherësh edhe zëvendëskryeministër i shtetit, thotë për Tribuna Channel se e inkurajojnë vazhdimin e dialogut ndërmjet Kosovës dhe Serbisë.

“Pozicioni i Sllovakisë ndaj Kosovës është miqësor dhe konstruktiv. Ky pozicion nuk është armiqësor, ne jemi duke punuar dhe bashkëpunuar me Kosovën në shumë fusha. Në ditët e sotme, bashkëpunimi ynë me Kosovën është më intensiv se sa disa vendeve që e kanë njohur Kosovën,” është shprehur Stano.

Sipas tij, normalizimi në vazhdimësi, marrëveshjet e tjera dhe zbatimi i tyre do t’i hapin rrugën Kosovës drejt BE-së.

“Qëndrimi ynë kombëtar është bazuar në deklaratën parlamentare për statusin e ardhshëm të Kosovës, që nënvizon – ndër të tjera – nevojën e normalizimit të marrëdhënieve me Serbinë,” ka deklaruar ai.