Heynckes premton ekip edhe më sulmues në “Bernabeu” të martën, pasi thotë se s’kanë çfarë të humbasin tashmë dhe se do ta sulmojnë Realin nga të gjitha anët.
Trajneri i Bayern Munich, Jupp Heynckes, thotë se ia falën fitoren Real Madridit (1-2) në “Allianz Arena” në ndeshjen e parë gjysmëfinale në Ligën e Kampionëve.
Ai ka premtuar se do të japin gjithçka në Santiago Bernabeu të martën e ardhshme.
“Ia falëm fitoren. Krijuam shumë shanse kundër Realit”, u shpreh Heynckes.
“Nuk kemi çfarë të humbasim në Madrit dhe mund të luajmë futboll edhe më të hapur atje, lirshëm… (për gjithçka)”, shtoi trajneri i Bayern Munich.
Ende nuk është konfirmuar, por Bayerni mund të luajë në ndeshjen e dytë pa Arjen Robben, Jerome Boateng dhe Javi Martinez – që të tre u zëvendësuan mbrëmë për arsye dëmtimesh. /Gazeta Express/