Policia angleze është e shqetësuar se drone (aeroplanë të vegjël komandues) mund të fluturojnë sipër stadiumit në derbin e Manchester që zhvillohet këtë vikend.

Daily Mail përmend rastin e lëshimit të banerit të Shqipërisë së madhe në stadiumin në Beograd në ndeshjen kualifikuese për Euro 2016 në mes të Serbisë dhe Shqipërisë.

Gazeta britanike po ashtu përmend edhe një incident të fundit në Etihad që ka alarmuar policinë, kur një person ishte arrestuar në një supermarket në afërsi, pasi kishte fluturuar dronin mbi stadium derisa City mposhti Tottenhamin me rezultat 4-1 dy javë më parë.

Mail po ashtu shkruan se dronet janë një problem në rritje, por skenat e dhunës si ato që u panë në Beograd nuk ka gjasa të ndodhin në Manchester, edhe nëse sipër kokave të tifozëve fluturon ndonjë baner provokues.

Ajo çfarë mund të jetë më shqetësuese është fakti i skadimit të suspendimit për një grup tifozët të flaktë të United, ashtu që janë më të mëdha gjasat që në ndeshje të jenë prezentë edhe një numër huliganësh. /Telegrafi/