Serbia ende nuk e ka dëshmuar ligjërisht në Bruksel shpërbërjen e “Mbrojtjes Civile” në veri të Kosovës. Ndërsa, Bashkimi Evropian nuk jep një përgjigjeje nëse Serbia e ka kryer këtë obligim.

“Bashkimi Evropian konfirmon se është bërë progres nga të dyja palët në zbatimin e marrëveshjes për integrimin e ‘Mbrojtjes Civile’. Për më tepër, procesi është duke shkuar në pajtim me marrëveshjen e bërë nga të dyja palët”, ka thënë Maja Kocijanciq, zëdhënëse e BE-së.

Rreth zbatimit të kësaj marrëveshje nuk ka dhënë përgjigje e ashtuquajtura Zyrë për Kosovën në Qeverinë e Serbisë. Kjo zyrë nuk ka qenë në gjendje të dëshmojë nëse Qeveria serbe ka dërguar në Bruksel dokumentacionin e nevojshëm që dëshmon shpërbërjen e mbrojtjes civile.

Ditë më parë, ministrja e Kosovës për Dialog, Edita Tahiri, kishte bërë më dije se Kosova ka kryer pjesën që i takon. Ajo kishte thënë se kjo organitatë tashmë është shpërbërë, në momentin kur janë integruar në institucionet e Kosovës 378 pjesëtarët e fundit nga kjo strukturë. /Tribuna Channel/