Pavarësisht se zgjedhjet janë certifikuar më 4 korrik dhe seanca e parë e Kuvendit është mbajtur më 17 korrik, partitë politike kanë kohë edhe së paku dy muaj për të formuar Qeverinë.

Kjo pasi Kushtetuta e Kosovës u jep kohë partive politike të formojnë Qeverinë më së largu 60 ditë prej momentit kur Presidentja nominon mandatarin për formimin e Qeverisë.

E, nominimi i mandatarit të Qeverisë pritet të ndodh tek pasi të votohet Kryetari i ri i Parlamentit.

Në këtë situatë, Presidentja përsëri pritet të caktojë datën e seancës konstituive pas publikimit të vendimit të plotë të Gjykatës Kushtetuese, e cila anuloi vendimin për zgjedhjen e Isa Mustafës për Kryetar të Kuvendit.

Sidoqoftë, Kushtetuta e Kosovës nuk ka paraparë nëse duhet të shpërndahet Kuvendi i Kosovës nëse nuk votohet Kryeparlamentari.

Kështu, Kushtetuta përcakton se shpërndarja e Parlamentit ndodh nëse nuk formohet Qeveria dy muaj pasi Presidentja të ketë caktuar mandatarin.

Ja çka shkruan Kushtetuta e Kosovës sa i përket shpërndarjes së Kuvendit:

Neni 82 [Shpërndarja e Kuvendit]

1. Kuvendi shpërndahet në këto raste:

(1) nëse brenda afatit prej gjashtëdhjetë (60) ditësh nga dita e caktimit të mandatarit nga Presidenti i Republikës së Kosovës, nuk mund të formohet Qeveria;

(2) nëse për shpërndarjen e Kuvendit votojnë dy të tretat (2/3) e të gjithë deputetëve, shpërndarja bëhet me dekret të Presidentit të Republikës së Kosovës;

(3) nëse brenda afatit prej gjashtëdhjetë (60) ditësh nga dita e fillimit të procedurës së zgjedhjes, nuk zgjedhet Presidenti i Republikës së Kosovës.

2. Kuvendi mund të shpërndahet nga Presidenti i Republikës së Kosovës, pas votimit të suksesshëm të mosbesimit të Qeverisë.