Shtetet e Quintit i kanë reaguar sot Qeverisë së Kosovës për qëndrimin karshi mabjtjes së referendumit të Serbisë për ndryshimet kushtetuese. Franca, Gjermania, Italia, Mbretëria e Bashkuar, Shtetet e Bashkuara dhe Bashkimi Evropian kanë thënë se Qeveria e Kosovës duhet të lejojë serbët të ushtrojnë të drejtën e tyre të votës dhe duhet të jenë pjesë e procesit zgjedhor.

Burime të Indeksonline bëjnë të ditur se përfaqësuesit e Quintit sot do të zbarkojnë në zyret e krerëve të shtetit.

Indeksonline mëson se po bëhet presion i madh që qeveria të heq dorë nga qëndrimi për moslejimin e mbajtjes së referendumit serb në Kosovë. Ambasadorët e shteteve të fuqishmë do të zhvillojnë një takim në zyret e kryeministrit Kurti, presidentes Osmani dhe kryeparlamentarit Konjufca.

“Ne mirëpresim referendumin kombëtar të Serbisë të 16 janarit për ndryshimet kushtetuese si një hap kyç për të forcuar pavarësinë e gjyqësorit dhe për të rritur transparencën dhe efektivitetin e institucioneve te shtetit të sundimit te ligjit. Ne besojmë se këto reforma janë një hap përpara drejt përafrimit të Serbisë me standardet evropiane dhe do të mbështesin procesin e anëtarësimit të Serbisë në BE.

Ne kemi inkurajuar të gjithë qytetarët e Serbise që të marrin pjesë në referendum dhe besojmë se është e rëndësishme që votuesit me të drejtë vote të mund të votojnë në zgjedhje dhe referendume.

Vërejmë me keqardhje se qeveria e Kosovës nuk ka lejuar Organizatën për Siguri dhe Bashkëpunim në Evropë (OSBE) të mbledhë fletëvotimet e votuesve me të drejtë vote që jetojnë në Kosovë për referendumin e ardhshëm, në përputhje me praktikën e kaluar. Ne i bëjmë thirrje qeverisë së Kosovës që të lejojë serbët në Kosovë të ushtrojnë të drejtën e tyre të votës në zgjedhje dhe procese zgjedhore në përputhje me këtë praktikë të vendosur.
I bëjmë thirrje qeverive të Kosovës dhe Serbisë që të përmbahen nga veprimet dhe retorika që rrisin tensionet dhe të angazhohen në mënyrë konstruktive në Dialogun e lehtësuar nga BE-ja. Është e rëndësishme që të dyja qeveritë të arrijnë progres drejt një marrëveshjeje gjithëpërfshirëse që hape perspektivën e BE-së dhe rrit stabilitetin rajonal” thuhet në përgjigjen e Quintit./Indeksonline/