Cristiano Ronaldo ka marrë një paralajmërim nga policia pasi pamjet u postuan në internet ku sulmuesi i Manchester United duket se i rrëzon një telefon nga dora një tifozi të Evertonit në një ndeshje të Premier League në prill.

Policia e Merseyside tha të mërkurën se “çështja tani ka përfunduar”.

Futbollisti 37-vjeçar u intervistua nga oficerët në lidhje me një pretendim për sulm dhe dëmtim kriminal pas incidentit në Goodison Park më 9 prill.

Policia e Merseyside nisi një hetim pasi një video u qarkullua në internet ku Ronaldo dukej se rrëzonte celularin e tifozit në tokë teksa ai ecte drejt tunelit pas humbjes 1-0 të United.

Pas incidentit, Ronaldo kërkoi falje në mediat sociale për “shpërthimin” e tij dhe e ftoi tifozin të shikonte një lojë në Old Trafford “si shenjë e lojës së ndershme dhe sportive”.

Megjithatë, nëna e tifozit e refuzoi. /Gazeta Express/