Ministrja e Ekonomisë, Artane Rizvanolli, pas mesnatës, me orën tonë lokale, është lajmëruar në Facebook duke ndarë lajmin nga Capitol Hill për nënshkrimin e marrëveshjes 236.7 milionë dollarëshe me SHBA-në.
Rizvanolli u shpreh “më se krenare” për marrëveshjen që e nënshkroi me shefen ezekutive e MCC-së, Alice Albright, raporton Gazeta Express.
“Lajm i mrekullueshëm nga Capitol Hill: Sapo nënshkruam marrëveshjen 236.7 milionëshe në hapësirat e Kongresit Amerikan! Në kohë kritike për sektorin e energjisë të Kosovës, jam më se krenare që në emër të Republikës së Kosovës të nënshkruaj një marrëveshje kaq të rëndësishme për sektorin e energjisë dhe ekonominë e vendit”, shkroi Rizvanolli.
Ajo u tha se “ky program do të mundësojë stabilizimin e furnizimit me energji elektrike, integrimin e burimeve te ripërtëritshme të energjisë dhe përgatitjen e fuqisë punëtore për punësim në sektor të energjisë, me fokus të veçantë tek gratë”.
“Dua të falënderoj Drejtoreshën e MCC-së për Kosovë, Sarah Olmstead dhe Udhëheqësin e ekipit vendor të zhvillimit të projektit, Lum Mita, si dhe të gjithë anëtarët e ekipit dhe të Kabinetit tim që kanë kontribuar në zhvillimin e programit. U jam mirënjohëse ekipeve të Qeverisë së Kosovës dhe të MCC-së për punën e madhe të bërë për të ardhur deri këtu, dhe zotohem që do të vazhdojmë të punojmë me përkushtim për të realizuar programin sa më shpejtë që është e mundur, në përputhje me nevojat dhe kërkesat e sektorit”, shkroi ministrja.
