Real Madrid fitoi sërish në “shtëpinë” e një prej skuadrave më të forta në Europë.
Për herë të tretë radhazi, “Los Blancos” dolën triumfues nga “Allianz Arena”.
Një herë me Carlo Ancelotti dhe dy herë me Zinedine Zidane në stol, duket se madrilenët janë kthyer në macen e zezë për Bayern Munich.
Numrat e trajnerit francez jashtë “Santiago Bernabeu” në ndeshjet e Champions League janë të jashtëzakonshëm: fitore në Romë, Napoli, Mynih (2 herë), Paris dhe Torino. Barazime në Mançester dhe humbje vetëm në Wolfsburg.
Këtë sezon, Real Madrid ka fituar në udhëtim ndaj PSG (1-2), Juventusit (0-3) dhe Bayern (1-2).
Kjo është hera e dytë në historinë e klubit që Reali arrin të fitojë ndeshjet jashtë në 1/8, 1/4 dhe 1/2 në Ligën e Kampioneve. Më parë kishte ndodhur në sezonin e largët 1961-1962.
Ndeshja e kthimit mes Realit e Bayernit do të zhvillohet të martën në “Santiago Bernabeu”. Los Blancos janë të vetëdijshëm se nuk do ta kenë të lehtë, ashtu si sezonin e kaluar kur u përballen në çerekfinale. /Gazeta Express/