Real Madridi është mbreti i ri i Evropës. “Los Blancos” e kanë fituar për të 14-tën herë Ligën e Kampionëve, duke e dëshmuar veten si ekipi më i mirë në Evropë.
Real Madridi triumfoi minimalisht 0:1 ndaj Liverpoolit, duke e përmbyllur në formë fantastike sezonin 2021/22, shkruan Gazeta Express.
Ndeshja nisi me 36 minuta vonesë, për shkak që ende nuk ishin vendosur në stadium shumica nga tifozët e Liverpoolit.
Pas fillimit, të dy ekipet luajtën me intensitet më të lartë, kurse Liverpooli mbante posedimin.
Në fund të pjesës së parë, Benzema shënoi gol, por që pas disa minutave konsultimi të VAR-it, goli u anulua për pozicion jashtë loje.
Në minutën e 59-të, një pasim i bukur i Valverdes e gjeti të lirë krejtësisht Vinicius Juniorin, i cili nuk e pati të vështirë ta dërgonte topin në rrjetë.
Dhe, më pas Real Madridi dhe tifozët e tyre “shpërthyen” në festë, teksa e shihnin trofeun e 14-të të Champions League para syve.
Që nga minuta e 60-të, Liverpooli e mori administrimin e ndeshjes dhe pati shumë raste, por Thibaut Courtois pati ndeshjen e jetës, duke mos lënë topin të kalonte pas tij.
Në fund, Real Madrid i gëzohet trofeut të 14-të të Ligës së Kampionëve. /Gazeta Express/
