Në Komunën e Rahovecit do të riaktivizohet shoqata e afaristëve të komunës, për të larguar problemet nga bizneset e ndryshme. Kjo marrëveshje u arrit në takimin e sotëm mes kryetarit të Komunës se Rahovecit, Idriz Vehapit, dhe afaristëve të kësaj komune.
Sipas Vehapit, gjendja e bizneseve në komunën e Rahovecit, por edhe në tërë vendin është mjaft e vështirë, mirëpo bashkëpunimi më intensiv mund të ndikojë në tejkalimin e situatave të pakëndshme afariste.
Sipas një komunikate për media, Vehapi ka kërkuar që afaristët të ndikojnë në vendimmarrjen komunale përmes këshillave e propozimeve të ndryshme dhe se zotimi i dhënë për lehtësim të taksave për bizneset që punësojnë mbi 5 punëtorë do të jetësohet së shpejti përmes një rregulloreje komunale.
Drejtori i Drejtorisë për Zhvillim Ekonomik Avdullah Kryeziu, tha se është duke u punuar që në vitin 2015 të ketë një rregullore të re për taksa, tarifa, gjoba dhe ngarkesa komunale.
Ndërsa, Mustafë Kryeziu, pronar i kompanisë “Xërxa”, u shpreh se nevoja e ekzistimit të shoqatës së afaristëve është e madhe sepse problemet janë të ngjashme për të gjitha bizneset.
Ismet Bojku, menaxheri i kompanisë “M&Sillosi”, që tashmë operon me pronar të rinj nga kompania “Devolli Grup”, tha se ndryshimet e pronësisë janë pritur mirë nga banorët e Rahovecit dhe shprehu bindjen se bashkëpunimi me organet komunale do të jetë i frytshëm. /Telegrafi/
