Mbrëmë nga Instituti Kombëtar i Shëndetësisë Publike të Kosovës ndër 14 rastet e reja me Koronavirus në Kosovë, u paraqit edhe një rast nga Komuna e Lipjanit nga fshati Krojmir, shkruan Gazeta Insajderi.

Në lidhje me këtë, Insajderi ka kontaktuar me zëdhënësin e kësaj komune, Diamant Bytyçin, i cili dha detaje për personin e prekur me COVID-19.

Ai, tregoi se sipas Policisë, ky preson ka qenë me punë në Malin e Zi, dhe pas kthimit ai ka hyrë në karantinë nga ku është zbuluar se është i prekur me Koronavirus.

“Personi e dimë që ka ardhur nga Mali i zi, dhe sipas stacionit policorë kemi informata që nuk ka qenë për ta vizituar fshatin”, ka thënë Bytyçi.

Mirëpo, sipas Bytyçit, IKSHPK-ja nuk i ka dërguar Komunës ndonjë shkresë zyrtare dhe komuna e tyre e ka kuptuar vetëm nëpërmjet rrjetit social Facebook.

“Në emër të shtabit kemi kontaktuar në Institut por nuk na kanë dhënë informata shtesë për shkak të ruajtjes së privatësisë të palës”, është shprehur zëdhënësi i Komunës së Lipjanit.

Deri më tani në gjithë Kosovën janë të infektuar 226 persona, të shëruar rezultojnë 37 ndërsa 6 të vdekur./