Shoqata e të pagjeturve në Komunën e Podujevës ka kërkuar që Qeveria e ardhshme ta ketë prioritet zbardhjen e fatit të të pagjeturve, pasi familjarët e personave të pagjetur janë ankth dhe në pritje, e cila po zgjat tash e 15 vite, për të zbardhur fatin e më të dashurve të tyre.
Në një komunikatë për media të kësaj shoqate thuhet se Institucionet e Kosovës kanë përgjegjësi, jo vetëm morale, por edhe ligjore për zbardhjen e fatit të personave të pagjetur.
“Në pritje të formimit të Qeverisë së re të Kosovës, familjarët e personave te pagjetur, por edhe institucionet vendore dhe ndërkombëtare janë të informuara se këto ditë në varrezën masive në Rudnicë janë duke u nxjerr trupat e pajetë të shqiptarëve, kurse pritet të hapen edhe dy varreza tjetër po ashtu në Rudnicë, me trupat e shqiptarëve të vrarë gjatë luftës në Kosovë. Për këto dhe varreza të tjera është folur që nga viti 2007, kur ka filluar hulumtimi i parë në Rudnicë. Mirëpo, Institucionet e Kosovës asnjëherë nuk e kanë pasur prioritet çështjen e të pagjeturve, as gjatë bisedimeve me palën serbe”, thuhet në njoftimin e kësaj shoqate.
Sipas tyre, premtimi i zëvendëskryeministres në detyrë, Edita Tahiri, dhënë familjarëve të personave të pagjetur se çështja e të pagjeturve që të jetë temë diskutimi gjatë dialogut me palën serbe, nuk doli të jetë i vërtetë, por ishte një mashtrim i radhës që institucionet e Kosovës ua bënë familjare të personave të pagjetur.
“Kjo tregon se nuk ka pasur vullnet nga të dy palët për ndriçimin e fatit të të pagjeturve. Nëse dikush mendon në këtë mënyrë të harrohet e kaluar, e ka shumë gabim, sepse familjarët e te pagjeture, po edhe familje të të vrarëve, plagosurve, të dhunuarave dhe viktimave të tjera nuk do ta harrojnë te kaluarën, sikur që as qytetarët e Kosovës nuk do t’i harrojnë vuajtjet dhe tmerrin e së kaluarës”, thuhet më tej në komunikatë.
Më tej në njoftim thuhet se shoqata për persona të pagjetur dhe viktima të luftës “Përkorë” në Podujevë shpreson, por edhe kërkon nga Qeveria e ardhshme e Kosovës që ta ketë prioritet kryesor çështjen e të pagjeturve.
“Qeveria e ardhshme nuk duhet të negociojë me palën serbe për të pagjeturit, por ta kushtëzojë atë me kthimin e trupave të shqiptarëve qe gjenden nëpër varreza masive, apo vendet të ndryshme në Serbi. Askush nuk ka të drejtë të negociojë për trupat e shqiptarëve nëse duhet t’u kthehen familjarëve, apo jo”, thuhet në njoftim.
Drejtues të kësaj shoqate theksojnë se do të ishte jo humane dhe e pa moralshme që me trupat e njerëzve të pagjetur të negociohet për çështje të përfitimeve politike.
Institucionet e Kosovës duhet të kërkojnë përgjegjësi nga shteti i Serbisë jo vetëm për vrasjet, kidnapimet, dhunimet e njerëzve në Kosove, por edhe për bartjen e trupave të shqiptarëve të vdekur, por edhe atyre të gjallë nga Kosova në Serbi.
Janë paraqitur mjaft dëshmi se gjatë luftës shumë shqiptar ë të gjallë janë dërguar dhe ekzekutuar në Serbi. Ndërsa ekzistojnë prova të pakontestueshme se në Batajnicë të Serbisë janë kryer djegie masive të trupave të shqiptarëve. /Telegrafi/