Brenda qershorit ndodhën edhe dy raste tragjike, një në Prizren e tjetri në Prishtinë, ku vdiqën tre fëmijë. Në kryeqytet motër e vëlla, 11 dhe 13 vjeç, u mbytën në një gropë të mbushur me ujë, ndërkaq në Prizren u shembë një shtëpi e vjetër dhe zuri përfundi një vajzë 3-vjeçare.

Numri i vdekjeve në trafik në gjashtë mujorin e parë të këtij viti është rritur për dallim nga viti i kaluar. Në 46 aksidente kanë ndërruar jetë 50 persona, dy më shumë se në periudhën janar-qershor të vitit të kaluar kur kanë ndodhur 43 aksidente të cilat lanë 48 të vdekur, raporton lajmi.net

Kjo për Policinë e Kosovës është tepër shqetësuese e cila apelon për vigjilencë dhe respektim të rregullave të komunikacionit.

“Gjendja mbetet tepër shqetësuese duke pas parasysh që rritje e theksuar është evidentuar në muajin Qershor 2016 ku kemi pasur 10 aksidente fatale me 11 persona të vdekur. Përderisa, edhe në total nëse krahasojmë gjashtëmujorin e parë 2015 me periudhën e njëjtë 2016, kemi një rritje të këtyre aksidenteve në përgjithësi”, thuhet në përgjigjen e Zyrës për Informim të PK-së për lajmi.net

Përveç apelit për kujdes të shtuar dhe përmbajtjes së shenjave të komunikacionit, Policia e Kosovës thotë se do të vazhdojë të monitoroj dhe menaxhoj situatën në trafikun rrugor duke zbatuar edhe sanksionet e parapara me ligj, në mënyrë që të bëhet përpjekje për shmangie të aksidenteve, në veçanti atyre me fatalitet