Shërbimi Sekret rus FSB, ka publikuar sot një video, ku pretendon se në video shihet duke u marrë në pyetje një agjent ukrainas i quajtur Ridvan Sulemanov.

Sipas medieve ruse, Sulemanov ka pranuar se si kishte përzgjedhur me vëmendje vendet ku do të montonte bombat në aeroport dhe në stacion të autobusit në Simferopol të Krimesë, transmeton Telegrafi.

Ai ka thënë se kishte mbërritur në Simferopol më 29 korrik, dhe se “kishte vizituar stacionin kryesor të autobusëve dhe aeroportin, ku kishte gjetur katër lokacione të mundshme për vendosjen e mjeteve shpërthyese.

Sulemanov gjithashtu ka pranuar se përshkrimet e këtyre vende, ia kishte dërguar njeriut që e kishte rekrutuar atë në qytetin ukrainas Zaporozhye gjatë tetorit të vitit të kaluar. /Telegrafi/