Drejtori i Agjencisë Kundër Korrupsionit, Hasan Preteni, është shprehur i pakënaqur me ecurinë e procesit të deklarimit të pasurisë.

Ai ka thënë në një intervistë për “Epokën e re” se për tri javë vetëm 1.400 zyrtarë i kanë deklaruar të ardhurat e tyre.

Preteni ka paralajmëruar se AKK do t’i publikojë emrat e atyre që nuk e deklarojnë pasurinë si dhe do të ushtrojë kallëzime penale ndaj tyre.

Sipas tij, ka progres te pjesa e parandalimit të korrupsionit, por sa i përket luftimit mbetet shumë për të dëshiruar.

Preteni ka thënë se në vendin tonë nuk ka vullnet, guxim dhe kurajë të mjaftueshme për t’u ballafaquar me këtë të keqe.