Policia e Kosovës ka intervenuar sot në fshatin Lumbardhë të Deçanit pasi banorët e këtij fshati kanë pasur problem mes vete lidhur me ndërtimin e një xhamie. Zëdhënësi i Policisë, Xhevat Ibra ka thënë se policia është përgjigjur thirrjes dhe ka shkuar në vendin e ngjarjes. Aty kanë ndërhyrë në një mosmarrëveshje të banorëve rreth një objekti fetar. Ndërkohë, Sekretari i BIK’ut ka thënë se një familje është bërë pengesë për ndërtimin e xhamisë së fshatit.

Vetëm gurë-themeli i xhamisë është ndërtuar në fshatin Lumbardhë të Deçanit. Ndërtimi i pjesës tjetër është ndërprerë nga një familje e këtij fshati që po kundërshton ndërtimin e objektit fetar.

Policia e Kosovës është njoftuar për këtë ngjarje dhe ka shkuar në vendin e ngjarjes. Zëdhënësi i Policisë për rajonin e Pejës, Xhevat Ibra, ka treguar për Express, se në Lumbardhë ka mospajtime mes dy taborëve lidhur me ndërtimin e një objekti.

Me këtë rast, Policia s’e ka arrestuar asnjë person pasi s’ka pasur as përleshje mes palëve dhe as veprime tjerë të jashtëligjshme.

Ai ka thënë se nga Policia ka kërkuar që mos t’i lejojnë vëllezërit Lekaj të jenë pengesë e fshatit për ndërtimin e tempullit fetar.

“Janë tre vëllezër kundër fshatarit për të mos lejuar ndërtimin e xhamisë. Asambleja e Komunës na ka dhanë pëlqimin, Ministria e Pushtetit Lokal po dhe tash po presim aprovimin nga Ministria e Ambientit”, ka thënë Ukaj, për Express, të dielën.

Ky zyrtar i Bashkësisë Islame ka treguar se ka nënshkrimet e mbi 95 për qind të fshatit për të ndërtuar xhaminë, ndërsa, vetëm tre vëllezërit Lekaj kanë dalë kundër dhe po kundërshtojnë vazhdimin e ndërtimit të objektit.