Policia e Kosovës ka apeluar te qytetarët për kujdes të shtuar në trafik. Kjo pasi sic thuhet, reshjet e shiut të cilat kanë shkaktuar vërshime ditëve të fundit kanë dëmtuar infrastrukturën rrugore.

Policia ka njoftuar se në disa segmente ka pasur shembje të gurëve e dheut, gjithashtu në vendet malore ka pasur reshje të borës ku është vështirësuar qarkullimi në trafik.

Tutje, thuhet se sipas shërbimit meteorologjik edhe ditët në vijim do të ketë reshje të shiut e në pjesë të ndryshme të vendit pritet të ketë edhe reshje bore, ku në disa segmente rrugore mund të ketë rrjedhje të ujit, shembje të gurëve e dheut. Po ashtu kujdes i shtuar duhet treguar edhe në ura ku mund të krijohet mjegull, ngrica dhe shtresa të akullit që ndikojnë në sigurinë e trafikut rrugor.

“Policia e Kosovës, APELON të gjithë pjesëmarrësit që të respektojnë rregullat e trafikut, të përshtatin shpejtësisë e lëvizjes me kushtet e krijuara, të mbajnë distancë të sigurt në mes mjeteve, të mos përdorin telefonin gjatë ngasjes, të përdorin dritat dhe të përqendrohen në ngasje”, thuhet në apelin e policisë. /Telegrafi/