Me një gjatësi vetëm 1.55 metra, por me një fuqi muskulore që i lejon të kacavirret kudo. Një atlet e vërtetë që i shfrytëzon aftësitë e tij fizike për t’u ngjitur në pallate, për të hyrë përmes ballkoneve e dritareve. Kështu e përshkruajnë mediat lokale italiane 35-vjeçarin Blerim Halili, i cili është arrestuar për vjedhje në Rimini.

Halili është pjesëtari i tretë i një bande që u pikas pas një vjedhjeje nga karabinierët e Fanos, ndërsa largoheshin me një makinë të kuqe “Nissan Micra”.

Mjeti drejtohej nga një shtetase italiane, Stefania Longhi, 43 vjeç, ndërsa në të ndodhej edhe një 28-vjeçar shqiptar, Françesko Nikaj. Pavarësisht se ia ka dalë t’i shpëtojë policisë, e cila ka arrestuar dy bashkëpunëtorët, liria e Halilit nuk ka zgjatur shumë.

Ai është vënë në pranga një ditë më pas në Aversa. Policia thotë se banda përdorte makina që ishin në rregull me çdo gjë, të cilat drejtoheshin nga 43-vjeçarja Longhi, për të mos zgjuar dyshime.

Vjedhjet kryheshin në kohë rekord, pasi Halili ishte shumë i shkathët në ngjitjen e mureve. Hetimet kanë nxjerrë se vetëm gjatë një pasditeje, ata kishin vjedhur tetë apartamente në Montegranaro, Pesaro. Të tre jetonin në Rimini, ku për të mos rënë në sy nuk kishin kryer asnjë vjedhje.

Policia ka gjetur një “thesar” të vërtetë në shtëpitë e tyre. /Shekulli/