Partia Demokratike e Kosovës ka thënë se do t’i drejtohet këtij organi për ta vlerësuar nëse zgjedhja e Isa Mustafës në krye të Kuvendit të Kosovës është bërë në harmoni me normat kushtetuese. Pak orë pasi Mustafa mori postin e kryeparlamentarit, PDK doli me qëndrim se nuk e njeh vendimet e sotme të Kuvendit të cilat, sipas partisë së Hashim Thaçit, u morën në kuadër të një procesi “antiligjor, antidemokratik dhe antikushtetues”.
“Është çështje ditësh, çështje orësh kur PDK do ta dërgojë këtë kërkesë në kushtetuese”, tha nënkryetari i PDK-së, Enver Hoxhaj, pas mbledhjes së sotme të kryesisë së PDK-së, e nxitur pas zhvillimeve të fundit në Kuvend. “Partitë politikë humbëse të zgjedhjeve të 8 qershorit, në kundërshtim me Kushtetutën e Republikës së Kosovës, ligjet në fuqi dhe rregulloren e punës së Kuvendit… sot dhunuan institucionin më të lartë duke e shndërruar atë në arenë të imponimit arbitrar të vendimeve të kundërligjshme”, tha Hoxhaj.
PDK ka ftuar anëtarësinë e vet që “ta ruajnë qetësinë” karshi këtyre zhvillimeve të cilat Hoxhaj i quajti si “të pashembullta”. “PDK duke i konsideruar të kundërligjshme, nuk i njeh këto vendime që dolën nga një proces antiligjor antidemokratik dhe antikushtetues andaj si partia politike më e madhe në vend do t’i drejtohet
Gjykatës Kushtetuese lidhur me zhvillimet e sotme arbitrare në Kuvendin e Kosovës”, u shpreh Enver Hoxhaj.
Ftojmë anëtarët dhe simpatizantët e PDK-së dhe gjithë qytetarët e RK që ta ruajnë qetësinë karshi këtyre zhvillimeve të pashembullta duke vendosur besimin e tyre në funksionimin demokratik dhe legal të institucioneve të Republikës së Kosovës.