Në fund të dhjetorit të këtij viti bëhen dy vjet që nga paraqitja e rastit të parë me coronavirusin e ri në Wuhan të Kinës. Deri më tash në gjithë botën janë regjistruar mbi pesë milionë vdekje dhe miliona të tjerë të infektuar

Pasojat e kësaj sëmundjeje vazhdojnë edhe pas procesit të shërimit në aspektin psikologjik, sidomos te personat që vuajnë nga ankthi e depresioni.

Psikologu Petrit Thaçi thotë në një intervistë për KosovaPress se rreth 5.8 për qind e personave mund të shfaqin çrregullime të ankthit ose depresionit si pasojë e gjendjes së krijuar.

Ai tregon se grup-moshat më të prekura janë ato midis 20 e 30 vjeç. Përveç këtyre nga këto çrregullime janë të prekura edhe grup-mosha e fëmijëve, ajo e mesme dhe ato të shtyra.

Psikologu Thaçi thotë se te këta persona shfaqen çrregullime të ankthit dhe depresionit, vërehet një pa rahati, por edhe mbyllje nga rrethi shoqëror.

Personat me çrregullime të ankthit kanë një lloj parehatie

“Shenjat te personat me çrregullime të ankthit dhe më shpesh vërehet një lloj parehatie, një tendencë e një lloj hiperaktiviteti, pa përqendrim. Pra është frika ajo që mbizotëron tek ata, një frikë e brendshme, e pa specifikuar qartë që shpërfaqet me sjellje të pa sigurisë. Ndërsa te personat depresivë gjejmë një pasivitet, një ndjenjë lodhjeje dhe një pamje e lodhur, mos interesim pra mbyllje totale në vetvete edhe kur janë prezentë në rrethet sociale dhe janë të tërhequr brenda mureve të shtëpisë”, ka thënë ai.

Ka studime afatgjata lidhur me këtë, që tregojnë, se pas një karantine intensifikimi i shqetësimeve të tilla si frika, pagjumësia apo një çrregullim i stresit postraumatik është më i lartë, por psikologu Thaçi thotë se nuk ka ndonjë dallim mes të moshuarve apo të rinjve, mes burrave apo grave.

5.8 për qind e personave kanë çrregullimet të ankthit si tërësi

“Statistikat asnjëherë nuk kanë arritur të flasin për një numër të përqindje së saktë, por diku variojnë nga 5.8 për qind te çrregullimet e ankthit si tërësi, ndoshta ka burime në literaturë ku depresioni mund të shtrihet deri në 17 deri 18% në një formë të popullsisë së përgjithshme, por prapë se prapë nuk e ka një saktësi dhe kohëve të fundit mund të vërejmë një tendencë për rritje sidomos të çrregullimeve të ankthit. Ka gjasa më të mëdha që kjo periudha 20 deri në 30 vjeç të jetë më shumë e përfshirë edhe me çrregullime të depresionit dhe me çrregullime të ankthit, por nuk ka një limit moshe që të themi se vetëm kjo moshë preket. Pra, kemi çrregullim të ankthit edhe të fëmijërisë, të moshave të mesme dhe të shtyra, por sikur prirjet më të larta janë nga 20 deri 30-vjeç ku fillojnë fazat e para të pjekurisë, të hyrjes në botën e analizave për jetën dhe veten”, ka thënë Thaçi.

Po ashtu Thaçi flet edhe për paragjykimin që mund të kenë personat me ankth dhe depresion, e që sipas tij më shumë kanë frikë vetë personat se do të kenë paragjykime, se sa do të ndodhë me të vërtetë si akt.