Manipulimet në sistemin e drejtësisë asnjëherë nuk ka dalë më sheshtas që nga afera “Pronto” se sa nga letra e ish-prokurorit special, Elez Blakaj. Ai po akuzonte Kryeprokurorin e Shtetit, Aleksander Lumezin, që ka ndërhyrë në punën e tij duke mbrojtur politikanët. Kryeministri Haradinaj publikisht fyu ish-prokurorin që ka hetuar mashtrimet në listat e veteranëve, Pas gjithë kësaj, u organizua edhe protestë nga shoqëria civile, ndërsa opozita po qëndron e heshtur. LDK pa koment, ndërsa Dardan Molliqaj ka pasur një reagim tejet të butë, që fliste në parim për aferën “Pronto”.
Nuk pati reagime nga opozita edhe pse një ish-prokuror po rrëfente se u pengua nga politika, përmes Kryeprokurorit, që të kryente hetimet rreth mashtrimeve në listat e veteranëve.
Ndërsa ofendimeve që i bëri Kryeministri Ramush Haradinaj, ish-prokurorit Blakaj, nga opozita, i reagoi lideri i Vetëvendosjes, Albin Kurti, shkruan Gazeta Express.
Molliqaj i PSD’së, dikur i njohur për reagime të ashpra, shkroi në Facebook se rasti i fundit me manipulimet në listat e veteranëve tregon kapjen e sistemit të drejtësisë nga pushteti.
“Afera “Pronto” kishte faktuar atë që tashmë e dinim: sistemi i drejtësisë dhe shteti në përgjithësi janë kapur nga një grup kriminel që po drejton pushtetin. Rasti i fundit i manipulimit me listat e veteranëve, e pastaj i kërcënimit të prokurorëve që tentuan ta zbardhin këtë manipulim, tregoi sërish këtë të vërtetë”, ka shkruar të martën mbrëma Dardan Molliqaj.
Ish-prokurori Elez Blaka akuzoi me një letër publike se Krypreokurori i Shtetit e ka qortuar pse ai e ka intervistuar në cilësinë e dëshmitarit kryeparlamentarin Kadri Veseli. Lumezi e pranoi se ka ndodhur diçka e tillë.
Blakaj, i cili thoshte se është kërcënuar derisa po hetonte listat e veternëve, e akuzoi Lumezin edhe se ka dashur ta kthej mbrapsht aktakuzën e ngritur për aferën Pronto.
Pas letrës së ish-prokurorit, i cili menjëherë pas dorëheqjes shkoi në Amerikë, Shoqëria Civile ka organizuar sot në orën 18:00 protestë kundër Kryeprokurorit Aleksander Lumezi. /Express/
