Atdhe Nuhiut iu dha përsëri mundësia për ta dëshmuar veten si titullar nga trajneri Garry Monk për Sheffield Wednesday, mirëpo sulmuesi kosovar s’arriti të luajë rol të madh në skuadrën e tij gjatë pjesës së parë dhe trajneri vendosi ta zëvendësojë.
Sheffield Wednesday arriti të sigurojë fitore me rezultat 2:1 në ndeshjen kundër Brentfordit, që u zhvillua sot në stadiumin Hillsborough, në kuadër të xhiros së 20-të të Championshipit, nivelit të dytë të futbollit në Angli, raporton Gazeta Express.
Pasi që kishte arritur të shënojë fundjavën e kaluar kur ishte titullar, Atdhe Nuhiu e fitoi një vend në sulmin e Sheffieldit edhe sot. Megjithatë, kosovari sot s’arriti të lërë gjurmë në këtë ndeshje, ku u zvëvendësua nga Jordan Rhodes në pushimin pas pjesës së parë.
Gjatë këtyre 45 minuta lojë, Nuhiu e pati vetëm një goditje dhe ajo shkoi jashtë kuadratit të portës, ndërsa nuk arriti ta rrezikojë portierin kundërshtar asnjëherë seriozisht.
Statistikat e grumbulluara nga SofaScore tregojnë se Nuhiu tentoi të driblonte vetëm një herë dhe nuk pati sukses, ndërsa ishte 40 për qind i saktë në pasime, përderisa topin e prekur gjithsej 22 herë gjatë pjesës së parë.
Nuhiu dominoi në duelet ajrore, duke i fituar gjashtë nga gjithsej shtatë, mirëpo nuk e kishte të njëjtin fat edhe në duelet në tokë, pasi i humbi të gjitha katër. Statistika më shqetësuese për kosovarin është se ai e humbi topin 13 herë gjatë këtyre 45 minuta lojë, duke bërë që të marrë notën 6.6
Kosovari do të shpresojë se kjo paraqitje e tij të mos ketë ndikuar që ai ta humbë pozitën e titullarit në skuadrën e Monkut, që pas katër ditësh do të zhvillojë ndeshje kundër Derby Countyt, në kuadër të Championshipit sërish. /Gazeta Express/