E përditshmja katalonase, Sport, raporton se Neymari ua ka dhënë ish-bashkëlojtarëve të tij në Barcelonë mendimet e veta për ofertën e parë zyrtare të “Blaugranëve” për të.
Neymari ende e dëshiron kthimin e tij në “Camp Nou”, mirëpo ai i ka disa dyshime për ofertën e parë të katalonasve për Paris Saint-Germainin, pasi që ajo është nën vlerën e 160 milionë eurove, transmeton Gazeta Express.
Futbollisti ia bëri të ditur këtë ofertë ish-bashkëlojtarëve të tij në Barcelonë, duke u thënë se është paksa i zhgënjyer pasi që oferta duhet të jetë më e lartë për ta pranuar Paris Saint-Germaini.
Mediat spanjolle kishin raportuar para tre ditësh se Barcelona e ka bërë ofertën e parë zyrtare për Neymari, mirëpo futbollisti nuk beson se oferta e katalonasve është mjaftueshëm e mirë për ta bindur PSG-në të shesë brazilianin.
E gjitha kjo situatë rrezikon ta dështojë transferimin e Neymarit në Barcelonë këtë verë, pasi që francezët e kanë bërë të qartë se përderisa janë të gatshëm ta shesin brazilianin, do ta bëjnë këtë gjë vetëm për ofertën e duhur.
Në anën tjetër, Neymari frikësohet të flasë publikisht pasi që ka mundësi që dy klubet – PSG-ja dhe Barcelona – të mos arrijnë marrëveshje dhe pastaj ai do të mbetej në një situatë shumë të keqe në klub.
Neymari beson se nëse Barcelona bën ofertë më të madhe, Paris Saint-Germaini do të detyrohej ta shesë brazilianin, veçanërisht pasi tifozët e klubit e kanë bërë të qartë se nuk e duan më Neymarin në skuadër, duke e quajtur atë bir k*rve dhe duke e kërkuar largimin e tij përmes pankartave nëpër ndeshje.
Rreziku tjetër për Barcelonën vjen prej rivalit të saj të përjetshëm, Real Madridit. Edhe madrilenët janë të interesuar për brazilianin dhe PSG-ja do të preferonte ta shiste në Madrid para Barcelonës. /Gazeta Express/
