Neymari u trishtuar pasi pësoi një lëndim të parakohshëm me Paris Saint-Germain por tani është në rrugë të mirë t’ia dalë mbanë të kthehet për Kupën e Botës, ka thënë doktori i ekipit kombëtar të Brazilit.
26-vjeçari e theu ashtin e pestë në shputën e këmbës së djathtë gjatë ndeshjes së PSG-së kundër Marseille më 25 shkurt në Ligë 1, transmeton Express.
Pas një konfuzioni fillestar, u vendos që Neymar kishte nevojë dhe duhej t’i nënshtrohej një operacioni, i cili mund ta lërë atë jashtë fushave të blerta deri në tre muaj.
“Ai u trishtua shumë kur kuptoi seriozitetin e lëndimit dhe mësoi se do t’i duhej të operohej”, ka thënë Rodrigo Lasmar për L’Equipe.
“Në prag të një gare siç është Kupa e Botës, është gjithmonë paksa frikësuese. Në fillim ai u mërzit shumë, por fuqia e riaftësimit dhe forca mendore që ka i ndihmuan ta tejkalojë këtë”, ka shtuar ai. /Express
