Kryetari i Komunës së Lipjanit, Imri Ahmeti, me bashkëpunëtorë priti në takim Drejtoreshen e aktivitetit të USAID-it, Qeverisja e Pronës, znj.Jennifer Ober, ku kanë nënshkruar Memorandum të Mirëkuptimit, i cili është edhe formalizimi i bashkëpunimit në mes së Lipjanit dhe Tetra Tech ARD, Inc. kontraktor që zbaton Aktivitetin Qeverisja e Pronës të financuar nga Komuna e Lipjanit dhe USAID-i.

Aktiviteti i Pronës është një aktivitet pesëvjeçar që synon të përmirësoj sistemin e të drejtave pronësore në Kosovë për të rritur fuqizimin e grave dhe përmirësuar të drejtat formale të pronës dhe investimet në pronën e paluajtshme.

Kryetari Imri Ahmeti dhe Drejtoresha e aktivitetit të USAID-it, për Qeverisje e Pronës, znj.Jennifer Ober janë dakorduar për të bashkëpunuar ngushtë rreth qëllimit të Aktivitetit dhe në kuadër të këtij Memorandumi të dy palët synojnë t’i shfrytëzojnë resurset e tyre përkatëse për të arritur rezultatet e synuara.

Komuna e Lipjanit dhe Aktiviteti janë të përkushtuar ndaj parimeve të qeverisjes së mirë: sundimi i ligjit, transparenca, llogaridhënia, efiçienca, efektshmëria, përgjegjshmëria, përfshirja dhe pjesëmarrja e qytetarëve.