Në Qendrën Korrektuese dhe Qendrën e Paraburgimit në Lipjan, si dhe Qendrën Korrektuese në Dubravë, nuk respektohet Ligji për ekzekutimin e sanksioneve penale, që është miratuar në Kuvendin e Republikës së Kosovës në vitin 2013, shkruan sot Koha Ditore.
Në këto qendra ka ndodhur që të miturit të vendosen në dhoma të njëjta me të rriturit e të dënuarit për kundërvajtje të vendosen në qeli të njëjta me personat që janë të dënuar me më shumë vite burgim e për vepra penale më të rënda.
Me këtë nuk respektohet neni 33 i këtij ligji, në të cilin parashihet vendosja e personave të dënuar në institucionin korrektues.
Në pikën tre të këtij neni thuhet se “gjatë vendosjes së personit të dënuar në institucionin e veçantë korrektues, ose në njësi të veçantë të institucionit korrektues, duhet të merret parasysh mosha e tij, llojet dhe pesha e dënimit, fakti se a ka qenë më parë i dënuar, shëndeti i tij fizik dhe mendor, kërkesat për trajtim të veçantë, lokacioni i vendbanimit, ose i vendqëndrimit të familjes së tij, siguria e tij, si dhe arsyet lidhur me arsimimin, ose punët që mund të jenë të rëndësishme për riintegrimin e tij shoqëror dhe të kritereve tjera të përcaktuara me akt nënligjor”.
Zëvendësavokatja e popullit, Shqipe Ibraj-Mala, ka thënë se gjatë monitorimit që kanë zhvilluar në Qendrën e Korrektuese në Lipjan, ku janë të vendosura femrat, kanë hasur në raste kur të miturat janë të vendosura në të njëjtën qeli me të rriturat.
