Shtypja e madhe ujin në pusin e familjes Ilazi e hedh shumë lart.

ky shpërthim doli befasishëm në Torinë të Lipjanit, derisa  pronari i tokës kishte hapur pus të thellë në kërkim të ujit të pijes.

Nga kureshtja, këtë burim kanë ardhur ta shohin nga afër edhe banorët e tjerë, e vetë Emin Ilazi (pronari i tokës), tashmë e pranon se gjithë kjo sasi e ujit i tejkalon kërkesat e familjes së tij.

Por, krahas banorëve në Torinë u mblodhën edhe zyrtarë komunalë të udhëhequr nga kryetari Imri Ahmeti.

Drejtori për mbrojtje dhe shpëtim, Aqif Rrustemi thotë se për këtë fenomen, ka njoftuar edhe komisionin e pavarur për minerale dhe miniera, derisa ka dyshime se këtu po buron edhe diçka tjetër pos ujit.
Kurse, vetë kryetari i komunës thotë se është ende herët të konstatohet se në këtë zonë ka rezerva të gazrave, megjithatë rikujton se në këtë zonë në vitet 70-ta ishin bërë shpime gjeologjike.

Ai paralajmëroi hulumtime nga institucionet gjegjëse për të kuptuar se çfarë lloji i gazit po del bashkë me këtë ujë.

Vetëm pak ditë më parë, në po këtë fshat, një tjetër banor gjeti një burim të gazit natyror.

Kronikë nga Blerta Ahmeti.