Fitore me shije të hidhur, apo humbje zhgënjyese e dyfishtë – kështu mund të konsiderohet ndeshja në “Allianz Arena” për Real Madridin e Bayern Munichun, raporton Gazeta Express.

Real Madridi mori fitore të rëndësishme në ndeshjen e parë gjysmëfinale kundër Bayernit, por humbi dy lojtarë – Iscon dhe Dani Carvajalin.

Isco u dëmtua në fillim të pjesës së parë në shpatull dhe pothuajse gjatë gjithë 45 minutave, ai luajti më dhimbje, bëri të ditur Zinedine Zidane, që inkuadroi Marco Asension menjëherë në fillim të pjesës së dytë.

Kurse Dani Carvajal, la fushën e lojës në minutën e 67-të, duke u inkuadruan në lojë sulmuesi, Karim Benzema, kurse vendin e mbrojtësit spanjoll e zuri Lucas Vasquez.

Ndërsa Bayerni, përveç humbjes, përjetoi edhe zhgënjimin e dëmtimeve. Arjen Robben, Jerome Boateng dhe Javier Martinez – që të tre u dëmtuan në sfidën në “Alianz Arena”.

Robben e Boateng u larguan nga loja në pjesën e parë, kurse Martinez në minutën e 75’.

Për Martinez, fillimisht u mendua se është zëvendësim taktik, por Jupp Heynckes konfirmoi se spanjolli u largua pasi kishte disa shqetësime.

Pra, të mërkurën mbrëma në “Allianz Arena”, u bënë pesë zëvendësime të detyrueshme, vetëm Mateo Kovacic në minutën e 83’ hyri në lojë në vend të Casemiros si ndërrim taktik.

Ndeshja e kthimit do të zhvillohet në “Santiago Bernabeu” të martën, aty ku Bayerni edicionin e kaluar me po të njëjtin rezultat nga sfida e parë, i bëri shumë telashe Real Madridit. /Gazeta Express/