Pas fitores së djeshme të Romës, kundër Palermos (2-4), mediat italiane kanë vlerësuar në maksimum paraqitjen e mesfushorit belg, Radja Nainggolan, i cili është kthyer në një lider në mesfushë.

Nainggolan është intervistuar nga mediat italiane, ku ka analizuar fitoren si edhe ka folur për jetën e tij.

“Këtë sezon mendoj se do të garojmë seriozisht për titull, ndaj dhe në çdo ndeshje, japim gjithçka vetëm për të dalë fitues. Sfida kundër Palermos mendohej të ishte e vështirë, por në fund ia kemi dalë mbanë të fitojmë, pa shumë stres”, tha reprezentuesi belg.

I pyetur nga gazetarët për jetën e tij të përditshme, belgu nuk e fsheh që është adhurues i klubeve të natës.

“Nuk jam tip që luaj futboll e më pas shkoj të mbyllem në shtëpi. Pëlqej të jetoj jetën ndaj dhe shumicën e kohës e kaloj në diskotekë. Nuk mund të quhem ‘rebel’, pasi në fushë e kam treguar potencialin tim dhe për këtë arsye nuk pranoj kritika”.

“I njoh të gjithë lokalet e Romës, pasi i kam vizituar dhe në shumicën e tyre kaloj kohën. Nëse një ditë doni të argëtoheni dhe kërkoni një lokal si rekomandim, mjafton të më pyesni mua”, ka thënë belgu. /Telegrafi/