Në vitin 2012 shqiptari i ri, në festën (garën) vjetore të kantonit Appenzell kishte fituar kurorën e parë, si 17 vjeçar. Kjo arritje shënonte pikën kulmore të sezonit për të atëbotë, për çka u bë edhe temë e medieve.
Por për mediet, suksesi sportiv Naimit kishte vetëm rëndësi të dorës së dytë. Prejardhja e tij e huaj ishte temë më e rëndësishme për to. “Isha i vetëdijshëm se prejardhja ime kosovare ishte ajo që u interesonte te unë”, thotë i riu tashmë 19 vjeçar.
Dhe, në fakt prania e medieve ishte bërë e tepërt për të. Ai dëshironte që me sukseset në “ring” të arsyetonte interesimin e madh të medieve e jo me diçka tjetër. Por, presioni i brendshëm që i ishte krijuar pengonte rezultatet sportive të schwingerit të ri.
“Sikur të kisha dhënë më pak intervista atëbotë… Përpiqesha së tepërmi që veprimet t`i mbështetja me fjalë”, thotë ai sot. Veç kësaj, edhe një lëndim i thembrës bëri që Fejzaj i ri ta humbiste gjithë sezonin sportiv të vitit 2013. Naimi ishte afër t`i humbiste shpresat por sërish mbizotëroi vullneti i çeliktë dhe ai vazhdoi stërvitjet edhe pse ende ecte me kukëza.
Në fillimet e marrjes me këtë sport, Naim Fejzaj ishte paraqitje e jashtëzakonshme në mesin e sportistëve që të gjithë ishin zviceranë të lindur. Vetëm 1 për qind e të gjithë mundësve tradicionalë të Zvicrës janë me prejardhje të huaj. Dhe përkundër faktit se Fejzaj është i lindur në Zvicër, atij i duhej t`i duronte fjalët si “çfarë dëshiron ky `Jugo`këtu” etj., të thëna nga konkurrentët e tij në kampionatin e parë për të rinj.
Si ish xhudist, atij depërtimi fillestar në sportin e ri i ishte dukur i thjeshtë. Ai ishte pritur mirë në klubin e sa që madje ishte befasuar se sa shpejtë e kishin pranuar kolegët në mesin e tyre. Prejardhja asnjëherë nuk kishte qenë pengesë në vlerësimin e rezultateve. Prandaj nuk është befasuese që ai ndjehet zviceran.
“Në Zvicër jam i lindur, jam rritur dhe e kam ndërmend që këtu edhe të plakem”, thotë mundësi i ri. Në sportin e tij, Naimi e pëlqen luftën “mes burrash”, me ç`rast ashpërsia e treguar në ring, kthehet në miqësi pas përfundimit të saj.
Fejzaj përveç me mundje, merret edhe me hendboll. Ai është portier për BSG Vordeland në Ligën e Dytë të Zvicrës.
Në sezonin aktual, Fejzaj, pas pauzës së shkaktuar nga lëndimi ka filluar sërish t`i radhisë sukseset. Së fundi ai ka fituar edhe njëherë kurorën në festën kantonale të mundjes. Tash ai shpreson ta fitojë kurorën edhe në festën kantonale të mundjes në Shaffhausen. Dhe, në rast se e fiton edhe këtë kurorë, për të do të festojnë jo vetëm në Wolfhaden por edhe në Radavc./albinfo/
