Mbi 50 delegacione të shteteve të ndryshme e kanë konfirmuar deri më sot pjesëmarrjen në inaugurimin e presidentit të zgjedhur të Kosovës, Hashim Thaçi.
Delegacione nga shtete të ndryshme të Ballkanit, nga Egjipti e deri te Amerika Latine do të jenë të pranishme në këtë ceremoni.
Këtë e ka konfirmuar edhe këshilltari i Thaçit, Abelard Tahiri.
Në një prononcim për Telegrafin, Tahiri ka thënë se Këshilli Organizativ është në vlugun më të madh të punëve, sepse ceremonia e inaugurimit është njëherësh edhe ngjarja më e madhe protokollare në historinë e deritashme të Kosovës.
“Po, deri më tash janë mbi 50 delegacione të shteteve të ndryshme që e kanë konfirmuar pjesëmarrjen në ceremoninë inauguruese të presidentit të zgjedhur të Kosovës. Përveç shteteve të Ballkanit, pjesë e ceremonisë do të jenë edhe delegacione të shumta, që nga shtetet e Kuintit, e deri te Egjipti dhe Amerika Latine”, ka thënë këshilltari i Thaçit, Abelard Tahiri.
Tahiri ka thënë se ditëve të ardhshme do të japin informacione më të detajuara rreth pjesëmarrjes së delegacioneve, por sipas tij, niveli i përfaqësimit të shteteve në këtë ngjarje do të jetë i lartë dhe në krye të delegacioneve do të ketë edhe presidentë, kryeparlamentarë dhe qeveritarë të shteteve të ndryshme.
Ndryshe, presidenti i zgjedhur Hashim Thaçi do të betohet më 7 prill para deputetëve të Kuvendit të Kosovës, kurse me 8 prill, në orën 11:00, me një ceremoni solemne edhe do të inaugurohet si president i ri para rreth 1000 mysafirëve. /Telegrafi/
