Ministri i Mbrojtjes, Ejup Maqedonci dhe komandanti i Forcës së Sigurisë së Kosovës, gjenerallejtënant, Bashkim Jashari, kanë pritur në takim komandantin e Komandës së Forcave të Përbashkëta Aleate të NATO-s në Napoli, admiralin Stuard Munsch.

Siç bëhet e ditur, gjatë takimit është diskutuar për situatën e sigurisë në vend pas agresionit të Serbisë kundër Kosovës më 24 shtator.

Në këtë takim, Munsch ishte i shoqëruar nga komandanti i KFOR-it në Kosovë, Angelo Michele Ristuccia.

“Në këtë takim u bisedua për çështjen e sigurisë në vend, ku ministri Maqedonci dhe Gjeneral Jashari shprehën mirënjohje të thellë për punën, përkushtimin, rolin dhe rëndësinë e KFOR-it në Kosovë, duke theksuar se ruajtja e sigurisë në Republikën e Kosovës është me interes për të gjithë. Në veçanti, ata shprehën falënderim për mbështetjen e NATO-s në ruajtjen e paqes dhe stabilitetit në vend, pas agresionit dhe sulmit terrorist ndaj Kosovës më 24 shtator. Ministri Maqedonci theksoi gjithashtu përkushtimin e institucioneve të Republikës së Kosovës për paqe dhe stabilitet si dhe vendosmërinë e palëkundur në rrugën tonë euroatlantike”, ka njoftuar Ministria e Mbrojtjes.

Sipas komunikatës, në këtë takim është rikonfirmuar gatishmëria për thellim të bashkëpunimit ndërinstitucional në mes të Ministrisë së Mbrojtjes dhe FSK-së me KFOR-in