Sergej pëlqehet shumë nga Mourinho, por duhet të presë deri pas Botërorit nëse dëshiron ta bëjë të tijin.
Sergej Milinkovic-Savic ishte padyshim një nga mesfushorët më të spikatur të sezonit që lamë pas dhe jo më kot ka tërhequr vëmendjen e shumë klubeve të mëdha evropiane.
Vetë drejtuesit e Lazios, skuadër që disponon kartonin e serbit, kanë pranuar se mesfushori me shumë gjasë do të largohet, por kanë vënë një çmim vërtetë të kripur për të, 100 milionë euro.
Së fundi, nga grumbullimi me Serbinë në kuadër të botërorit “Rusi 2018”, vetë mesfushori deklaroi se të ardhmen e tij do ta vendosë vetëm pas përfundimit të eksperiencës në Botëror.
“Dëgjoj çdo ditë emra skuadrash dhe oferta të ndryshme, por kam folur me menaxherët e mi, që këtë çështje ta lëmë pas Botërorit”, u shpreh Sergej.
“Tani jam i përqendruar te ky event dhe vetëm pasi të kemi përfunduar, do të filloj të dëgjoj dhe vlerësoj ofertat. Deri atëherë rrini të qetë”, deklaroi Milinkovic-Savic.
Përveç Manchester United, për lojtarin që Lazio kërkon 100 milionë euro, interesohen edhe Reali, PSG-ja e Arsenali. /Gazeta Express/
