Të hënen Republika e Kosovës feston 12 vjetorin e Pavarësisë. Në Komunën e Lipjanit janë paraparë disa aktivitete përgjatë kësaj dite.
Sipas një njoftimi që ka bërë Komuna e Lipjanit, të hënen nga ora 10:00 do të mbahet seancë solemne kushtuar përvjetorit të Pavarësisë, pastaj nga ora 11:00 do të bëhet homazhe pranë shtatorëve, lapidarëve të dëshmorëve dhe martirëve, ndërsa nga ora 15:00 do të mbahet koncert festiv në qendrën kulturore “Tahir Sinani” në Lipjan.
Kryetari i komunës së Lipjanit, Imri Ahmeti, së bashku me drejtoret e drejtorive përkatëse ka takuar drejtorët e shkollave të qytetit në Lipjan.
Ahmeti ka njoftuar se gjatë këtij takimi kanë diskutuar për përgatitjet dhe mbështetjen e nxënëseve për festën e pavarësisë me gardërobë festive dhe pajisje të tjera që janë të nevojshme për organizimin e aktiviteteve.
Aktivitete të tilla kanë filluar ditë më herët në Komunën e Lipjanit kushtuar festës së Pavarësisë.
