Komandanti i batalionit të dytë “Ruzhdi Salihu”, që ka operuar në fshatin Krojmir të Lipjanit, Ramiz Qeriqi – i njohur me nofkën Komandant Luani – bashkë me 16 udhëheqës të tjerë të këtij batalioni, dyshojnë se do të ketë parregullsi në listën e veteranëve të UÇK-së të cilën e kanë përgatitur krerët e Nismës për Kosovën, Fatmir Limaj e deputeti Haxhi Shala, shkruan sot Koha Ditore.

Limaj në atë kohë ka qenë komandant i Brigadës së Zonës së Pashtrikut, për të kaluar më pas si komandant i përgjithshëm i policisë në nivel të Shtabit të Përgjithshëm, ndërsa Haxhi Shala bëhet komandant.

Dyshimet e Qeriqit dhe të bashkëluftëtarëve të tij bazohen në atë se Limaj dhe Shala në atë kohë formuan partinë politike Nisma dhe në fazën e verifikimit kanë ftuar njerëz të këtij subjekti politik.

Gjithashtu, përveç verifikimit, udhëheqësit e këtij batalioni dyshojnë se në listë të veteranëve janë futur njerëz që nuk kanë qenë në luftë, vetëm pse e kanë përkrahur këtë parti politike.