Shefi i Grupit Parlamentar të AAK-së Pal Lekaj, ka vlerësuar se kryeparlamentari Kadri Veseli shpeshherë po e luan rolin e kryeministrit.

Ai ka thënë se veprimet e fundit të Veselit e Zëvendëskryeministrit Ramiz Kelmendi, të cilët po marrin pjesë në përurime të fabrikave e shkollave të ndryshme, bëhen zakonisht në kohë fushatash elektorale.

“Kjo çështja e investimeve dhe turrit për të prerë shirita sidomos në kohërat e fushatave elektorale, tashmë është bërë e zakonshme. Mjerimi është që nuk po punohet për shtetin por shtetin po ja përshtatin vetes disa funksionar, e kjo është më rrezik për të ardhmen e Kosovë”, ka deklaruar Lekaj në një prononcim për Zëri.info.

Sipas tij, këto premtime e prerje të shiritave për kinse investimeve, kanë bërë që qytetarët të humbasin besimin komplet në sistemin politik të vendit.

Në këtë drejtim siç është shprehur Lekaj, shpesh ka edhe përzierje të funksioneve, siç është rasti i kryetarit të kuvendit.