Kryetarja e Komunës së Gjakovës, Mimoza Kusari-Lila, në një postim në Facebook ka shkruar se “ethet e humbjes së pushtetit në Komunën e Gjakovës, për AAK-në ndjehen edhe sot kur temperaturat janë përmbi 33 gradë celcius”.
Lexojeni të plotë postimin e Kusarit në Facebook:
Komuna e Gjakovës i dhuron AAK-së, 3 muaj trajnim falas dhe 4 vite tjera opozitë!
Ethet e humbjes së pushtetit në Komunën e Gjakovës, për AAK-në ndjehen edhe sot kur temperaturat janë përmbi 33 gradë celcius.
Ankthi më i madh për këtë parti mbetet pamundësia për ti kërkuar haraç dhe për ti kushtëzuar edhe më tutje donatorët, investitorët dhe kompanitë të cilat tash e gjashtë muaj kanë gjetur një derë të hapur në Komunën e Gjakovës.
Aq i madh është zhgënjimi i humbjes sa që nuk e mbajnë mend as muajin se kur është mbajtur Konferenca e Donatorëve, e lëre më që marrin të drejtën të spekulojnë për shpenzimet që janë bërë gjatë kësaj konference.
Kur flasim për transparencën, së pari Komuna e Gjakovës është e gatshme të i ofrojë një trajnim 3 mujor gjithë degës së AAK-së sa për të kuptuar definicionin se çfarë është transparenca.
Opozita nuk mund të identifikohet vetëm me dy qështje të shpifura monotone siq është QKMF-ja dhe Konferenca e Donatorëve.
Megjithatë, Komuna e Gjakovës ju është përgjigjur disa herë rreth organizimit të Konferencës, por si duket patjetër Degës së AAK-së në Gjakovë duhet ti bëhet ftesë publike për të ardhur në Komunë për dy arsy.
Njëra, se nuk e kuptojnë dot se çfarë është Transparenca dhe tjetra për faktin se nuk dinë dhe nuk kanë parë se si organizohet një Konferencë e suksesshme e Donatorëve.
Për informatën tuaj të sërishme, në Konferencën e Donatorëve janë shpenzuar 16,000 euro ndërkaq vetëm pas fazës së parë të shqyrtimeve, Komunës së Gjakovës i janë dhënë donacion në vlerën mbi 300.000 euro.
Duhet rikujtuar fillimi i projektit të digjitalizimit te Administratës, projekti i digjitalizimit të Shkollave, projekti i Pallatit të Kulturës, projekti për ndërtimin e parkut kulturor në afërsi të shkollës së muzikës, rruga Dol-Kusar-Goden dhe inkuadrimi në projektin e alpeve shqipëtare, të gjitha këto rezultat i Konferencës së Donatorëve.
Interesi i AAK-së për zhvillimin e Komunës së Gjakovës është vrejtur gjatë 8 viteve të shkuara, e që së fundmi u vërtetua edhe dje me apstenimin e asambleistëve të këtij subjekti për shpalljen si zonë e interesit të veçantë të pronave të ndërmarrjeve shoqërore.
Grupi i asambleistëve të AAK-së si duket nuk i ka kuptuar as raportet financiare në mbledhjet e Asamblesë sepse po të ishte e kundërta nuk do vazhdonin me këto dilema naive.
Kjo komunikatë nuk do ofrojë më shumë përgjigje pasi që konsiderojmë se AAK-së dega në Gjakovë i duhet gjithsesi që të dal në media edhe njëherë në fundvit duke na përsëritur të njejtat pyetje.
Konsiderojmë se për të kuptuar rolin e tyre opozitar, elektorati I Komunës së Gjakovës do i qeras ata edhe me 4 vite tjera opozitë.