Gjermanët janë plot frikë dhe kanë nevojë për përgjigje nga politikanët e tyre pas katër sulmeve të dhunshme në më pak se një javë, dy nga të cilat kanë pasur lidhje me terrorizmin islamik, kështu ka thënë sot kryeministri i Bavarisë, Horst Seehofer.

“Kemi nevojë për më shumë siguri në Gjermani,” tha Seehofer, i cili është edhe lider i Partisë konservatore të Bavarisë, Unioni i Krishterë Social, duke i bërë thirrje qeverisë federale që të ndërmarrë veprim vendimtar për të përmirësuar sigurinë pas sulmeve, raporton Reuters, përcjell Express.

“Njerëzit janë të mërzitur, plot frikë, gjë që është plotësisht e kuptueshme. Ata kanë nevojë për përgjigje të besueshme nga politikanët dhe jo debate dhe arsyetime të pafundme,” tha ai.