Nën kujdesin e kryetarit të komunës së Lipjanit, Imri Ahmeti, sot në Amfiteatrin e Shkollës së Mesme Profesionale “ Adem Gllavica” është mbajtur Akademi Përkujtimore, me rastin e 14 qershorit, ditës së Dëshmorëve të Komunës së Lipjanit.
Nënkryetari i komunës së Lipjanit, Fitim Selimi, tha se amaneti i dëshmoreve të komunës së Lipjanit, është i jetësuar me të përgjithshmen dhe pavdekësinë, brez pas brezi.
“ Ideali i dëshmorëve tanë, mbetet i përjetësuar në lirinë e vendit, sepse sakrifica e tyre është dëshmi, e pazmbrapsur e pa tkurrur, është e jetësuar me krenarinë e atdheut, është e jetësuar me të gjithë ne.
Nënkryetari Selimi, po ashtu ka thënë, se rruga e lirisë ishte e vështirë, rrugë e sakrificës , ishte e pashmangshme për të arritur lirinë.
“ Ne e dinim, se çmimi i lirisë është i shtrenjtë , por e dinim po ashtu se pushtimi ishte i rëndë dhe i papërballueshëm. Në rrugën e lirisë ranë shumë dëshmorë, një pjesë tjetër u martirizua, një pjesë tjetër po haperon në ndërtimin e saj, shtetformues dhe shtetndërtues”, ka thënë nënkryetari Selimi.
Fjalë rasti, pati edhe Habib Olluri, përfaqësues i familjes së dëshmorëve. Përgjatë fjalës së tij, Olluri, tha se dëshmorët e rënë, janë shënjuesit më të mirë të lirisë dhe paqes.
Akademia është përmbyllur me program të pasur kulturor e artistik, ku njëherit përformuan aktori -Dibran Fylli, me recital kushtuar dëshmorëve dhe nxënësit e shkollës së mesme të ulët “ Ismail Luma”, me këngë korale.