Zyra për Integrime Evropiane në Lipjan, sot në një takim të përbashkët me Nënkryetarin e komunës së Lipjanit, Fitim Selimi dhe drejtorë të departamenteve të komunës , diskutuan rreth procesit të integrimeve evropiane. Sipas raportit të prezantuar, komuna e Lipjanit është përgjegjëse në 150 indikatorë që adresojnë sfidat të cilat dalin nga raporti i progresit, duke përfshirë, transparencën, zhvillimin ekonomik dhe ri-integrimin.
Nënkryetari i Komunës së Lipjanit, Fitim Selimi, tha se obligimi i komunës së Lipjanit përgjatë këtij procesi- të pyetësorit rreth integrimeve evropiane është detyrim i përbashkët komunal, dhe kërkoi nga departamentet komunale përkushtim maksimal.
Ndërsa, zyrtarja për Integrime Evropiane për komunën e Lipjanit, Mimoza Karameta, ka prezantuar Planin e Veprimit për Marrëveshjen e Stabilizim Asocimit (PVMSA), për komunën e Lipjanit për vitin 2015.
“ Arsyeja e këtij takimi të përbashkët që mbajmë sot është të kemi qasje më të plotë komunale në procesin e integrimit në BE, nëpërmjet analizës së indikatorëve të PVMSA-së”, ka theksuar zyrtarja Karameta, duke shtuar se shkëmbimi informatave me drejtoritë komunale do të jetë një pasqyrë më e qartë, karshi obligimeve që ka komuna në përmbushjen e integrimeve.
