Ardian Arifaj, këshilltari i Hashim Thaçit, ka shpjeguar detaje të ditës kur do të inaugurohet Thaçi President i Kosovës.

Ai në Info Magazine të Klan Kosovës dha se “do të ketë qindra të ftuar nga jashtë, liderë nga rajoni dhe gjithë bota”, derisa ka pohuar se gjithçka është e organizuar deri në imtësi.

“Çdo gjë është gati. Kemi bërë gati skenarin se si do të shkojë inaugurimi i Presidentit. Është hera e parë që një president në shkuarje i dorëzon detyrën një presidenti të ri, që është në ardhje. Kjo do të bëhet si traditë, ku presidentët e ardhshëm do t’ia bartin detyrën presidentëve të ri”, tha ai.

“Me 7 prill në Kuvendin e Kosovës do të mbahet seanca solemne, ku presidenti i ri zyrtarisht jep betimin dhe merr detyrën, kurse të nesërmen do të mbahet ceremonia e pranim dorëzimit. Në sheshin ‘Skënderbeu’ dhe ‘Ibrahim Rugova’ do të ketë një defile, ku presidentja së bashku me Presidentin e ri do të ecin përgjatë shesheve”.

“Do të ngjiten në skenë, aty do të ketë një kopje të kushtetutës së Kosovës ku do t’i dorëzohet Presidentit, si garantues i Kushtetutës si simbolizëm. Ppjesa kryesore do të jetë pjesa e fjalimit, ku do t’i shfaq prioritetet e tij”, ka shpjeguar Arifaj.