Pasi që tashmë e ka fituar një herë Champions League dhe së fundmi edhe La Ligën si trajner me Real Madrid, Zidane është duke u rezervuar si trajneri i ardhshëm i Francës.
Ish-reprezentuesi i Kombëtares së Francës, Frank Leboeuf, pret që trajneri i Real Madridit, që njëherësh është edhe bashkëkombësi i tij, Zinedine Zidane, përfundimisht do ta pasojë trajnerin aktual të Francës, Didier Deschamps, transmeton Express.
“Nuk e di se kur [trajneri aktual i Francës Didier[ Deschamps do të vendosë, apo kur federata franceze do të vendosë për ta larguar, por ne të gjithë ndjejmë se Zidane do të jetë trajneri i radhës në kombëtaren tonë,” ka thënë Leboeuf për BBC.
Me Kombëtaren e Francës, Leboeuf e ka fituar Kupën e Botës në vitin 1998 dhe Kampionatin Evropian në vitin 2000.
“Është shumë e vështirë ta drejtosh Real Madridin për një kohë të gjatë, sepse Perez është shumë i padurim. Kur të jetë e mundur, Zidane do t’i bashkohet kombëtares, dhe kjo është e sigurt,” ka thënë ai./Express/
