Edhe pas marrëveshjes për bashkëqeverisje në mes të PDK-së dhe LDK- së, formimi i institucioneve ka mbetur peng i ndarjes së dikastereve dhe paqartësive për postin e kryeministrit.
Pavarësisht se LDK pretendon se me marrëveshjen e 19 nëntorit posti i kryeministrit i takon atyre, PDK dhe kreu i saj, asnjëherë nuk e kanë thënë se ky post tashmë i takon LDK-së. Sipas tyre, posti i kryeministrit dhe postet tjera do të jenë pjesë e ndarjes së “kulaçit”, në mes të grupeve punuese.
Analistët politikë, vlerësojnë se mos thirrja e seancës po ndodh për faktin se partnerët e koalicionit janë të koncentruar më shumë në ndarjen e dikastereve sesa në programin qeverisës dhe pikërisht pozita e kryeparlamentarit mund të jetë subjekt i “pazarit”, në mes të PDK-së dhe LDK-së.
Petrit Zogaj, nga Lëvizja Fol, ka thënë se pas datës 19 nëntor, i gjithë koncentrimi i dy partive të mëdha është në ndarjen e posteve.
Kurse, Dren Doli, nga Grupi për Studime Juridike dhe Politike, ka thënë se nuk e di arsyen pse partitë politike nuk po e kërkojnë thirrjen e seancës. Sipas tij, edhe para arritjes së marrëveshjes se 19 nëntorit, por edhe tani nuk ka ndonjë arsyetim konkret i cili do të mund të arsyeton shtyrjen e seancës./Tribuna/
