Ander Herrera i Paris Saint-Germainit e ka pranuar se askush në skuadrën e Manchester Unitedit nuk kishte pritur që ata të fitonin në Paris gjatë sezonit të kaluar të Ligës së Kampionëve, kur “Djajtë e kuq” udhëtuan në Francë pasi humbën 2:0 në “Old Trafford”.
Manchester Unitedi doli fitimtar në këtë fazë me rezultat të përgjithshëm, duke i kaluar pritshmëritë me fitore 3:1 në Parc des Princes për ta zënë një vend në fazën çerekfinale falë epërsisë së golave të shënuar si mysafir, transmeton Gazeta Express.
Skuadra e Ole Gunnar Solskjaer u mposht pastaj me rezultat 4:0 nga Barcelona në çerekfinale, mirëpo Herrera, i cili u transferua në PSG gjatë afatit kalimtar të verës, ka zbuluar se askush në zhveshtoren e klubit as që kishte besuar se do të arrinin deri në atë fazë.
“Askush mes lojtarëve të Manchester Unitedit nuk kishte menduar se do të fitonim në Paris”, ka bërë të ditur mesfushori spanjoll në një intervistë të dhënë për Canal+.
“Në futboll, nuk mund ta humbasësh përqendrimin as për dy minuta sepse përndryshe duhet ta paguash. Kjo disfatë nuk ishte normale për PSG-në”.
Herrera nuk po gjen shumë minuta lojë në Paris që kur e kompletoi transferimin gjatë verës, pasi që gara për pozitat në mesfushën e skuadrës së Thomas Tuchel është e madhe, mirëpo 30-vjeçari e kupton këtë situatë.
“Unë besoj në “Karma”, besoj se gjithçka që jep, do të të kthehet. Kështu që nëse luaj në formacion e parë, e jap maksimumin; nëse luaj 10 minuta, jap gjithçka; nëse luaj pesë minuta, jap gjithçka; nëse luaj dy minuta, jap gjithçka. Kjo vlen për çfarëdo pozite”, shtoi Herrera. /Gazeta Express/