Kryetari i Aleancës për Ardhmërinë e Kosovës, Ramush Haradinaj , në një intervistë për IndeksOnline, ka folur në lidhje me raportet e tij me kryetarin e Nismës Socialdemokrate, Fatmir Limaj, kjo pas largimit të njërit nga figurat kryesore të kësaj parti, Haxhi Shala, në partinë e Haradinajt.
Haradinaj ka thënë se qëllimi i tij nuk ka qenë asnjëherë që ta dëmtojë Limajn apo partinë e tij.
Nuk është dëshira ime me dëmtu Limajn. Dhe Nismës asnjëherë s’ka qenë. Në fakt unë kam respekt për Fatmirin dhe për Nismën. Zotëri Haxhi Shala po ashtu e njoh gjatë e njoh nga koha ’99-ës e kam respekt për të, ishte një situatë bukur jetike ,kur ishte votimi i qeverisë. Haxhi e bani një nderë dhe e bani një përkrahje për qeverinë me votë.. Pas asaj rezultojnë që ne u ofruam dhe ai është deputet i Aleancës e falënderoj për besim”, ka thënë Haradinaj në këtë intervistë për IndeksOnline.
Haradinaj tutje ka shtuar se tani është e natyrshme që Shala të marrë me vete edhe bashkëpunëtorët e tij por se kjo nuk nënkupton një qëllim në vete të Aleancës për ta dëmtuar Nismën.
“E kuptoj se deputeti Haxhi Shala tani e merr me vete elektoratin ose kolegët ose bashkëpunëtorët që e kanë përkrah s’do me i lanë vetëm që është e drejtë, por nuk e shoh këtë si qëllim timin ose të Aleancës me dëmtu Nismën. Të ju them të drejtën i dëshirojë sukses Fatmirit dhe Nismës. Nuk është qëllimi imi me dëmtu Nismën”, tha Haradinaj.
Se a i ka mbetur hatri Limajt, pse Shala shkoj në partinë e Haradinaj, për këtë ai kishte këtë përgjigje.
“Nëse i ka mbetur hatri, ai më mirë është me pa si mundet ai me i riparua gabimet e të kaluarës sepse unë nuk jam shkaktar i thyerjes së tij me zotëri Shala. Zotëri Shala ka mundur të shkoj në ndonjë parti tjetër. Nuk e di pse duhet me i mbet hatri në mua”, theksoi Haradinaj.
Tutje Haradinaj këtë pjesë të intervistë e ka përmbyllur duke thënë se është i gatshëm edhe përkundër këtyre lëkundjeve të vogla, të vazhdoj bashkëpunimin me Limajn./IndeksOnline/