Shefi i Grupit Parlamentar të PDK-së, Adem Grabovci, në TV Rrokum ka treguar se pse sot subjekti i tij nuk e caktoi kryetarin e ri.

“Kemi respektuar Statutin. Duhet kohë deri te Konventa”, ka thënë ai, duke arsyetuar vendimin që Kadri Veseli të jetë ushtrues detyre i kryetarit.

Sipas tij, Hashim Thaçi është presidenti më gjithëpërfshirës i Kosovës, ndërsa demanton mediat ndërkombëtare që kanë shkruar se ai është zgjedhur në këtë post në shtetrrethim.

“Aty ku mungon vizion e mungojnë argumentet, fillon përdorimi i mjeteve te ndaluara. Kryeparlamentari Veseli asnjëherë nuk ia ka ndaluar asnjë deputeti të drejtën të flasë”, ka thënë ai.

Me djegien e veturave Grabovci tha se duhen të merren organet kompetente, ndërsa shton se “një katund që shihet, kallauz nuk do”, duke aluduar se ato janë djegur nga opozita. /Telegrafi/