Mjekët e Klinikës së Gjinekologjisë dhe Obstetrikës kanë protestuar sot një orë para objektit të këtij spitali duke kërkuar nga mediet që të mos shpifin gjëra të cilat nuk janë të vërteta.
Ata thanë se këto raste së pari duhet të shqyrtohen nga organet e drejtësisë e pastaj të dalin në medie.
Kjo për shkak se sipas tyre, informacionet e tilla po sjellin huti tek populli dhe po krijojnë mosbesim tek spitali shtetëror i Kosovës.
Kryetari i federatës së sindikatës së shëndetësisë, Blerim Syla, tha se ata do të kenë parasysh çdo vërejtje që është në drejtim të tyre, por, kërkoi bindshëm që ata të mos quhen kriminel.
“E kemi obligim shtetëror, kombëtar dhe moral që të përmirësohemi, por, ju lutem na kritikoni, por, nuk mund të na quani kriminelë sepse nuk jemi kriminelë”, ka thënë ndër tjerash Syla.
Ai, gjithashtu tha se në klinikën e Gjinekologjisë dhe Obstetrikës punohet mjaftë shumë, këtë sipas tij e dëshmon edhe viti i kaluar ku janë trajtuar mbi 17 mijë raste dhe se nuk ka pasur asnjë vdekje të nënave.
Sipas Sylës, me trillime të tilla përveç se po krijohet frikë tek popullata, po ashtu po rritet niveli i korrupsionit, dhe sipas tij, e gjithë kjo po shkon në të mirë të klinikave private. /Telegrafi/