Paris Saint-Germain e ka tepruar me kërkesën astronomike prej hiç më pak se 300 milionë euro për shitjen e Neymarit, sipas gazetës franceze, Le Parisien, e cila ka lidhje të ngushta me klubin parisien.

Le Parisien pohon se PSG-ja nuk do të pranojë asnjë ofertë më të ulët se 300 milionë euro për yllin brazilian, për faktin se ai ka kontratë edhe tri vjet me klubin, transmeton Gazeta Express.

Nëse PSG-ja ia del ta fitojë atë që po e kërkon, atëherë Neymar do të bëhet futbollisti më i shtrenjtë në histori të futbollit – për herë të dytë radhazi. Neymar është momentalisht futbollisti më i shtrenjtë në histori, pasi PSG-ja i pagoi 222 milionë euro për të kur e bleu nga Barcelona më 2017.

Çmim vështirë i arritshëm

Vështirë se ndonjë klub do ta fortojë këtë shumë për brazilianin. Mbase mënyra e vetme për të bërë një ofertë që iu përshtatet të dy klubeve, shitësit dhe blerësit, është ofrimi i lojtarëve për ta ulur çmimin e kërkuar nga klubi parisien.

Presidenti i PSG-së, Nasser Al-Khelaifi, e ka pranuar ditë më parë se është i hapur për ta biseduar shitjen e tij nëse vjen ndonjë ofertë.

Por, sipas Le Parisien, PSG-ja ia ka vënë këtë çmim Neymarin qëllimisht për ta detyruar atë që qëndrojë në klub. Neymar ka kërkuar të largohet dhe e dëshiron kthimin në Barcelonë, të cilën e quan shtëpi që nuk është dashur ta braktiste kurrë.

Gazeta franceze e përmend faktin se Real Madridi tashmë i ka shpenzuar mbi 300 milionë euro dhe Barça pritet ta konfirmojë blerjen e Antoine Griezmann për 120 milionë euro më 1 korrik, prandaj PSG-ja mendon se këto dy klube nuk do të pranojnë t’i paguajë 300 milionë euro për brazilian.

Megjithatë, për Barcelonën, ekziston një mënyrë përmes të cilës mund ta arrijë riblerjen e Neymar, sipas mediave spanjolle, duke e ofruar një shumë të lartë parash plus disa lojtarë, përfshirë Samuel Umtitin, Ousmane Dembelen dhe Ivan Rakiticin. /Gazeta Express/